Жорий йилда вилоятдаги 20та мактабни жорий таъмирдан ўтказиш режаланган. Шу жумладан, Сариоғоч туманидаги 7та таълим маскани таъмирга муҳтож. Тумандаги 4та таълим муассасаси “Қишлоқ – эл бешиги” дастури доирасида таъмирланган бўлса, қолган 3та мактаб вилоят бюджети ҳисобидан молиялаштирилади. Яқинда бир мактаб фойдаланишга топширилди. Яна бир мактабнинг таъмирлаш ишлари 2024 йилга ўтказилади. Қолган бештаси айни пайтда жорий таъмирдан ўтказилмоқда.

Вилоят ҳокими ўринбосари Бейсен Тажибаев Сариоғоч туманидаги ушбу мактабларни оралади.

– Мактабларнинг янги ўқув йилига тайёргарлигини назорат қилиш мақсадида ишчи гуруҳларини ташкил этдик. Таъмирланаётган 20та мактабнинг 15таси 1 сентябрдан фойдаланишга топширилиши керак. Сариоғоч туманидаги мактаблар орасида жадвалдан ортда қолаётганлари ҳам бор. Турли баҳоналар рўкач қилинмоқда. Бироқ асосий муаммо аниқ. Бу ишчи кучининг етишмаслиги ва ўз ишига лоқайдлик. Вилоят миқёсида тегишли харажат, яъни 4,5 млрд. тенге ажратилган. Бажарилган ишлар баённомасига мувофиқ яна молиявий қўллаб-қувватлашга тайёрмиз. Кечиктирилган компаниялар эса жаримага тортилади. Пудратчи ташкилотлар икки алмашинувда ишлашга ўтишга ваъда беришди. Шу муносабат билан қурилиш компаниясига қатъий огоҳлантириш бердик, ваколатли муассасалар жарима солади. Биз зудлик билан ишчи гуруҳ тузиб, назоратни кучайтирамиз, – деди Бейсен Даулетули.

Ҳоким ўринбосарининг айтишича, масъул корхоналар қурилиш ишларига биринчи навбатда зарур ишчиларни жалб этиб, белгиланган муддатда якунлаши шарт. Зеро, ўқувчилар ўқув жараёнидан ортда қолмаслиги учун шароитлар яратиш кўзда тутилган. Сабаби қандай бўлишидан қатъиназар, мунтазам таълим олиш керак.

Вилоят ҳокими ўринбосари Сариоғоч туманидаги 30 минг нафар бошланғич синф ўқувчиси сентябрь ойидан эътиборан иссиқ овқат билан таъминланишини таъкидлади. Уни тегишли даражада ташкил этиш мақсадида соҳа масъуллари мактаб ошхоналарининг моддий-техник ҳолатини кўриб чиқишларини маълум қилди.