Бошланғич ва юқори синф ўқувчилари алоҳида биноларда ўқишади

 Қозоғистонда «Бадастир мактаб» лойиҳаси доирасида қишлоқ ва шаҳарларда ҳам бир хил андазада мактаблар қурилади. Бу ҳақда ҚР Маориф вазирлигининг Молия ва бюджетни режалаштириш департаменти директори Ғалимжан Мўлдаш маълум қилди.

– Бугун ҳар бир ота-она фарзандининг таълим сифати ва шарт-шароити юқори мактабда таҳсил олишини истайди. Қолаверса, сўнгги йилларда таълим соҳасида амалга оширилаётган ислоҳотларга мос равишда таълим муассасаси ҳам ҳар томонлама ривожланган, қисқача айтганда, замонавий қиёфада бўлиши лозим. Шу муносабат билан мамлакатимизда «Бадастир мактаб» лойиҳаси доирасида замонавий таълим муассасалари барпо этилмоқда. Уларда 1-4-синф ва 5-11-синф ўқувчилари алоҳида биноларда ўқитилади. Мактаб спорт заллари 1-4-ва 5-11-синф ўқувчилари учун алоҳида жойлашади. Ҳар бир мактабда қизлар ва ўғил болалар учун алоҳида махсус устахоналар бўлади. Бу ва бошқа ўзгаришлар фарзандларимизнинг баркамоллигини ҳар томонлама ривожлантиришга қаратилган, – деди у.

«Бадастир мактаб» лойиҳаси доирасида қуриладиган мактабларнинг барчасида лифт бўлади.

 Таъкидлаш жоизки, «Бадастир мактаб» намунавий лойиҳалари бўйича фаолият юритадиган умумтаълим муассасалари учун ўқитишнинг махсус таълим андаза ва дастурлари ишлаб чиқилади ҳамда ўқув жараёнини ташкил этиш бўйича алоҳида талаблар қўйилади.