Туркистон вилояти ташкил этилганига 5 йил тўлиши муносабати билан вилоят маданият ва туризм бошқармасининг ташаббуси билан “Visit Turkistan” маркази майдонида “Музейлар карвони” кенгайтирилган сайёр кўргазмаси ўтди. Тадбирни вилоят маданият ва сайёҳлик бошқармаси бошлиғи Азимхан Қўйлибаев очди. 

– Миллий маънавиятимизнинг бир тармоғи бўлмиш аждодларимиз мероси, қадриятларини келажак авлодга етказишда музейнинг алоҳида ўрни бор. Ўтмишга эҳтиром, бугунимизни қадрлаш, келажакка ғамхўрлик асосий вазифамиздир, – деди бошқарма раҳбари. 

Сайёр кўргазманинг очилиш маросимида музей соҳаси фахрийси, ўлкашунос олим Абдулла Жумашев ва “Ҳазрат Султон” давлат тарихий-маданий қўриқхонаси археологи,  яссавийшунос Марат Туяқбаев сўзга чиқишди ва Туркистон аҳолиси ҳамда меҳмонлари эътиборига музей жамғармасидаги қимматбаҳо ёдгорликлар ва ноёб санъат асарлари кўргазмаси ҳавола этилди.

Айни пайтда вилоят музей жамғармасида 170 мингдан зиёд маънавий қадриятлар сақланмоқда. Уларнинг  аксарияти археологик ва этнографик экспедициялар натижасида тўпланган ноёб ёдгорликлардир.

Таъкидлаш жоизки, музейлар карвони 1 сентябрдан  29 октябргача жума, шанба ва якшанба кунлари  ўтади.