Вилоят «Farab» кутубхонасида Қозоғистон халқи тиллари кунига бағишланган “Давлат тили – Қозоғистон халқини бирлаштирадиган тил” мавзуида байрам тадбири ўтди. 

Унда вилоят маданият ва туризм бошқармаси раҳбари Азимхан Қўйлибаев, Ассамблея ёшлари республика жамоат бирлашмаси вилоят ваколатхонаси аъзоси Достон Абдуалиев иштирок этиб, йиғилганларни байрам билан табриклашди.

– Вилоятимизда давлат тилини ўзлаштирганлар аҳолининг 95 фоизини ташкил қилса, рус тилини ўзлаштирганлар – 64 фоиз, инглиз тилини биладиганлар эса 16,2 фоизни ташкил қилади. Жорий йилда тилларни ўқитиш марказларида 3 минг нафар шахс давлат тилини ўрганмоқда. Ундан 500 нафари бошқа этнос вакиллари. Бугунги кунда вилоятимиздаги этнос вакилларининг 74 фоизи қозоқ тилини билади. Биз қозоқ, рус, инглиз ва бошқа тилларни ўзлаштиришини давр талаби, деб билишимиз керак. Барчангизни Қозоғистон халқи тиллари куни билан табриклайман, – деди Азимхан Серикули.

Шундан сўнг, А. Қўйлибаев бир гуруҳ тил жонкуярларини вилоят ҳокимининг Фахрий ёрлиғи ва ташаккурномаси билан тақдирлади. Тадбирда туман, шаҳар тилларни ўқитиш марказлари томонидан кўргазма уюштирилди.