Туркистон шаҳридаги «Этноовул» мажмуасида Қозоғистон халқи Ассамблеясининг «Қозоқшунослик» илмий-маърифий лойиҳаси доирасида вилоятимизнинг 5 йиллигига бағишлаб этнос вакиллари орасида ҳунармандчилик буюмларини тарғибот қилиш мақсадида «Миллий маҳсулот – миллат мероси» мавзуида танлов уюштирилди. 

Вилоят ижтимоий тараққиёт бошқармаси раҳбари ўринбосари Бахт Ахимбетов танлов иштирокчиларига муваффақият тилаб, тадбирнинг аҳамиятига тўхталди.

– Туркистон – азалдан ҳунармандчилик маркази ҳисобланган. Бугунги тадбирнинг бош мақсади – қозоқ халқининг кўҳна ҳунармандчилиги, маҳоратига этнос вакилларининг қизиқишни орттириш, шунингдек, ҳунармандчилик маҳсулотларни оммага таништириш орқали истеъдодли, ташаббускор этнос вакилларининг фаоллигини юксалтириш, – деди Б. Сарсенбайули. 

Тадбир иштирокчилари танловнинг 5 тури бўйича маҳоратларини намойиш этишди. Нуфузли ҳакамлар ҳайъати уларнинг меҳнатини одилона баҳолаб борди. «Урчиқ йигириш» танловида тўлебийлик Шоҳиста Одилова биринчи, тулкибошлик Шакирзада Абилова иккинчи, мақтаараллик Тожи Даловарова учинчи ўринни эгаллади. «Кашта тикиш»да мақтаараллик Хуршида Турсунтошева биринчи, келеслик Малика Ибрагимова иккинчи, Александра Утвенко учинчи ўринни эгаллашди. «Қуроқ қураш» бўйича тўлебийлик Дилноза Умарова ғолиба бўлди, тулкибошлик Раиса Темирова иккинчи, Тамара Сманова учинчи ўринга сазовор бўлди. 

«Талқон туйиш» танловида тулкибошлик София Абилова биринчи, тўлебийлик Ирода Дўсметова иккинчи, Раъно Чолова учинчи ўринни эгаллади. «Текемет босиш» танловида савронлик Анаркул Абдуллаевага тенг келадигани бўлмади. Тулкибошлик Умриой Ирисалиева иккинчи, тўлебийлик Умида Бойметова учинчи ўринни, умумжамоа ҳисобида бош совринга Тулкибош тумани сазовор бўлди. Биринчи ўринни Тўлебий, иккинчи ўринни Саврон, учинчи ўринни Мақтаарал туманлари эгаллади. 

«Жамоат тотувлиги» ДКК раҳбари Э. Жанғазиева ғолиблар ва иштирокчиларга қимматбаҳо совғалар, диплом ва ташаккурномаларни тақдим этди.