Шимкент шаҳри, Сайрам даҳасидаги “GES” ўқув маркази ташкил топганига 10 йил тўлди. Шу муносабат билан уюштирилган тадбир таълим масканининг янги, 5 қаватли биноси очилиши билан бошланди. Дарҳақиқат, ўтган йиллар мобайнида ўқув маркази элга танилиб, обрў ва шуҳрат қозонди. Бугунги кунда марказда жами 5 мингдан зиёд ўқувчи таҳсил олмоқда.

Тадбирнинг очилиш маросимида ўқув маркази директори Дилором Мирсолиева ўн йилда амалга оширилган ишларга тўхталди. Сўнг Қозоғистонда хизмат кўрсатган қурувчи, таниқли тадбиркор Низомхон Сулаймонов, М. Ауезов номидаги Жанубий Қозоғистон универсиетети профессори, педагогика фанлари доктори Неъматжон Алметов марказнинг муборак ёши билан табриклаб, эзгу тилакларини изҳор этишди.

Дарҳақиқат, эришилган ютуқлар мўл. Хусусан, 10 йилда ўқув марказининг 2800 нафар талабаси грант соҳиби бўлди. Шунингдек, 2020-2023 йилларда ушбу марказда таҳсил олган 21 ўқувчи Назарбаев университетига ўқишга қабул қилинди. Жорий йили бундай шараф Нурқанат Дайраш, Аселя Ермахан ва Мансур Эргашваевларга насиб этди. Шунингдек, ўқув марказининг йигирмадан зиёд битирувчилари АҚШ, Хитой, Литва, Малайзия, Италия, Туркия каби давлатларнинг нуфузли университетларида таҳсил олишмоқда. 19 ўқувчи эса IELTS дастури асосида АҚШда бир йил таҳсил олиб қайтди.

Марказни турли йилларда тамомлаган Соибхон Ҳожихонов, Мафтуна Жўрабекова, Жавоҳир Мажримов, Сафина Тешабоева, Сурайё Абдурашидова, Музаффар Мамадалиев, Мафтуна ва Гулбаҳор Юсуфхонова каби ёшлар бугунги кунда хорижий компанияларда самарали фаолият юритишмоқда. Жумладан, шу куни даврани олиб борган сухандон Икром Баҳромов ҳам мазкур ўқув марказининг талабасидир. 

Бинонинг 4-қаватида жойлашган коворкинг марказга (Khadicha kovorking zone) фаол жамоатчи Б. Нуралиевнинг рафиқаси, марҳума Хадича опанинг номи берилди. Даврага таклиф этилган наманганлик меҳмон Маҳфуза ая эзгу тилакларини билдирди. Баҳодир Усмонали ўғли рафиқасининг мана шундай ўқув марказини бунёд этиш ҳақидаги орзуси ушалганини таъкидласа, фарзанди Алишер Нуралиев унинг ўгит ва насиҳатлари салмоқли эканини таъкидлади. Меҳнат фахрийси Анормат Аҳмадқулов ва Маҳфуза ая рамзий тасмани қирқиб, тадбир иштирокчиларини ичкарига таклиф этишди. Марказда кутубхона ташкил этилган. Бу ерда талабаларнинг дам олиши ва дарсга 

тайёрланиши учун барча шароитлар муҳайё.

Умид Бўташиқовнинг дўмбирада ижро этган куйи, “Ниҳол” мукофоти совриндори, таниқли хонанда Диана Ҳошимхонованинг қўшиқлари даврага файз бағишлади.

Бугунги кунда марказда 5 мингдан зиёд ўқувчи таҳсил олмоқда.