Қозоғистон Республикаси куни арафасида ўтган жума куни Қазиғурт туман ўзбек этномаданият бирлашмаси ташаббуси билан Турбат қишлоғида “Дўстлик дастурхони – палов фестивали” тадбири ўтди.Қишлоқ марказидаги “Рисқул ота” тўйхонасида ёзилган дастурхон атрофига қўшни Ўзбекистоннинг Тошкент шаҳри ва вилоятлари, Шимкент шаҳри ва Сайрам туманидан, Қазиғурт ва Турбат қишлоқларидан ташриф буюрган меҳмонлар жам бўлдилар.

Фестиваль иштирокчилари –   туманнинг энг моҳир ошпазлари  ўз иқтидорларини намойиш этиш мақсадида қозонга олов ёқиб, паловхонтўрани бошлаб юборишди. Ҳакамлар ҳайъати сайланди.

Ош пишгунга қадар тўйхонада даврани Қазиғурт туман ўзбек этномаданият бирлашмаси оқсоқоллар кенгаши раиси Б. Собитов бошқариб, меҳмонга табрик навбати  берилди. 

Дўстлик байрами билан барчани Қазиғурт тумани ҳокими А. Исмаилов, Социалистик Меҳнат қаҳрамони Т. Ағабеков, меҳнат фаҳрийси Н. Бектаев, Қазиғурт тумани жамоатчилик бирлашмаси раиси А. Жилқибаев табриклаб, омад тиладилар. Х. Саитқулов ҳамда таниқли тадбиркорлар Н. Амирсаидов ва С. Сайдусмоновларга Қозоғистон ўзбек этномаданият бирлашмалари “Дўстлик” ҳамжамияти номидан «Дўстлик»  медалини жамоат арбоби Ф. Қоратоев топширди. 

Туркистон вилоят ўзбек этномаданият бирлашмаси раҳбари ўринбосари Г. Расулова  таълим соҳаси жонкуярлари Р. Назиров (Ш. Қалдаяқов номли мактаб), А. Одилов ва Б. Олимов (Т. Тўла номли мактаб), А. Йўлдошев (туман тез ёрдам хизмати вакили)ни “Жамоат фидойиси” кўкрак нишони билан тақдирлади.

Ўзбекистонлик маданият ва санъат вакиллари ҳам дўстлик, миллий урф-анъаналарнинг бардавом бўлиши икки миллат ўртасидаги дўстона алоқаларнинг янада ривожлантиришда кенг имкониятлар яратилаётганини мамнуният билан қайд этдилар. 

Давра суҳбати оҳанрабо куй ва қўшиқлар, дилтортар рақсларга уланиб кетди.

Тайёр бўлган таомлар шоҳи – паловхонтўра лаганларга сузилди. Одил ҳакамлар ошпазлар меҳнатини муносиб баҳоладилар. Ғолиблар ва иштирокчилар ҳомийлар томонидан тақдирландилар. Барча меҳмонлар ажойиб тадбирни уюштирган  Қазиғурт туман  ўзбек этномаданият бирлашмаси  сардори Ж. Собитов ва унинг ташаббускорларига миннатдорчилик билдирдилар.

Тадбир Исмоил ота масжиди имомининг дуоси билан якунланди.