Сайрам туман ҳокими ўринбосари Ансар Ўсербаев раислигида ўтган девон йиғилишида кун тартибидаги 3та масала муҳокама қилинди. 

Жумладан, 2024 йилги туман бюджетини шакллантириш жараёни тўғрисида иқтисодиёт ва молия бўлими раҳбари 

А. Айтекеева маъруза қилди. 15 октябрга қадар туман бюджети лойиҳасини туман маслаҳатидепутатлари муҳокамасига киритиш режаланган. 

Шунингдек, йиғилишда туман уй-жой ва коммунал хўжалиги бўлими раҳбари вазифасини вақтинча бажарувчи Н. Абдилдаев ахлат ва чиқиндиларни ташувчи муассасаларнинг фаолияти тўғрисида ҳисобот берди. Унга кўра, тумандаги 11та қишлоқ ҳокимлигида 8та муассаса тозалик ишлари билан банд. 

Учинчи масала – вилоят ва туман ҳокимининг шахсий қабулида белгиланган вазифалар ижросига бағишланди. Жорий йилнинг 9 ойида туман аҳолисидан 2972та мурожаат тушган. Бу ўтган йилга нисбатан 24 фоиз кам. Шу билан бирга, ҳоким ўринбосари белгиланган вазифалар ижросини таъминламаган бўлим раҳбарлари ва қишлоқ ҳокимларининг жавобгарлигини амалдаги қонунчилик доирасида кўриб чиқиш ва тегишли таклиф киритишни топширди.

Йиғилишда А. Ўсербаев туманда ободонлаштириш, кўкаламзорлаштириш ва тозалик ишларини ташкил этиш бўйича аниқ вазифалар юклади.

Тадбир якунида А. Ўсербаев аҳоли томонидан кўтарилган ҳар бир масала ва таклифларнинг муҳимлигини таъкидлади.