15 май – Халқаро оила куни ҳамда Туркистон вилояти ташкил топганининг 5 йиллиги муносабати билан “Муҳаббат эстафетаси” номли ёш оилалар танлови ўтди.

Вилоят Ёшлар имконият маркази томонидан ташкил этилган танловда минтақанинг 17та туман ва шаҳарларидан энг яхши ёш оилалар иштирок этди. Унда оилалар “Ҳамкор”, “Ким чаққон?”, “Баскетбол”, “Боулинг” деб номланган тўрт босқичли мусобақада беллашишди. Тадбирнинг очилишида сўзга чиққан вилоят ҳокими ўринбосари Бейсен Тажибаев ушбу танловнинг оилавий қадриятларни мустаҳкамлашдаги аҳамияти ҳақида гапириб, иштирокчиларга муваффақият тилади.

– Мамлакатнинг барқарор тараққиёти учун ҳар бир оилада тинчлик, ҳамжиҳатлик ва фаровонлик бўлиши керак. Шу билан бирга, демографик ўсиш юқори бўлган Туркистон вилояти учун оилавий қадриятларни улуғлаш жуда муҳим. Зеро, кўп фарзандли оналаримизнинг аксарияти вилоятимизда истиқомат қилади. Минтақа ёшлар сони бўйича ҳам биринчи ўринда. Вилоятда ҳар йили минглаб ёшлар оила қурмоқда. Бугун оилавий ҳурмат, меҳнатсеварлик, маънавий-ахлоқий фазилатлар билан ажралиб турадиган оилалар беллашиб, ўзлигини намойиш этишди, – деди Бейсен Даулетули.

Танлов якунига кўра, оилада аҳиллиги билан ажралиб турган, авлодлар давомийлигининг ўзига хос намунасини кўрсатаётган энг намунали оилалар совғалар билан тақдирланди. Жетисайлик Ўтепбергеновлар оиласи 1-ўринга муносиб топилди. 2-ўрин сариоғочлик Ундирбековлар оиласига, 3-ўрин Туркистон шаҳридаги Ўразбековлар ва ўтрорлик Тўлешовлар оиласига насиб этди.

Шунингдек, Тўлебий туманидан Есқуловлар оиласи “Томошабинлар эҳтироми” номинациясига сазовор бўлди.