Сайёҳлик соҳасида тажриба алмашиш мақсадида Германия пойтахти Берлин шаҳрида ҳар йили “ITB Berlin - 2024” туристик кўргазмаси ўтказилади. Унга дунёнинг турли бурчакларидан 180дан зиёд давлат вакиллари таклиф этилади. Бу йил Қозоғистон илк бор ушбу кенг кўламли тадбирда фаол иштирок этди. Қозоғистон Республикаси Туризм ва спорт вазири ўринбосари Ержан Еркинбоев раҳбарлигидаги делегация мамлакат маданияти, миллий қадриятлари, жозибали туристик йўналишлари билан таништирмоқда.

Халқаро тадбирда Туркистон вилояти делегацияси ҳам иштирок этди.

Хусусан, Туркистон вилояти маданият ва туризм бошқармаси бошлиғи ўринбосари Нурдаулет Медеуов, “Open Turkistan” сайёҳлик ахборот маркази бош директори Серик Сандибаев, “Керуен сарай” ва “Top Tobe Grand Hall” мажмуалари, “Rixos Turkistan” меҳмонхонаси, “Turan Tour” сайёҳлик оператори, “CIT Travel” сайёҳлик агентлиги махсус лавҳада Туркистоннинг туристик салоҳияти ҳақидаги маълумотларни тақдим этди.

Нурдаулет Медеуовнинг сўзларига кўра, немис халқи ва турли мамлакатлардан келган меҳмонлар, тажрибали мутахассислар ва туризм бизнеси вакиллари томонидан Қозоғистон тарихига улкан қизиқиш билдирилди. Улар орасида Туркистон туризмига қизиқиб, маълумот олганлар ҳам бўлди. 

Шунингдек, «Pegasus Airlines», «Centrum Air», «Pegas» компаниялари раҳбарлари билан ўтган учрашув натижасида Туркистон ва Марказий Осиёга сайёҳларни жалб этиш, янги ҳаво йўналишларини йўлга қўйиш масалалари муҳокама қилинди. 

Бундан ташқари, “99Travel” компанияси раҳбари билан Туркистонни Жанубий Кореяда тарғиб қилишни ташкил этиш ва туроператорларни таклиф қилиш, Марказий Осиё бўйлаб қўшма сайёҳлик маҳсулотларини тавсия этиш масаласи юзасидан меморандумлар имзоланди. Германия, Франция, Испания, Индонезия, Жанубий Корея, Туркия каби давлатларнинг 40дан зиёд сайёҳлик компанияси раҳбарлари билан учрашувлар ўтказилиб, ҳамкорликни йўлга қўйишга келишилди.