Вилоят ҳокимлигида мактабларда ўқувчилар хавфсизлигини таъминлаш, ўқувчилар ва ўсмирларни қўллаб-қувватлаш масалаларига бағишланган мажлис ўтди.

Унда прокуратура, полиция департаменти, санитария-эпидемиология назорати департаменти ва бошқармалар раҳбарлари иштирок этди. Мажлисда вилоят ҳокими Дархан Сатибалди мактабларда хавфсиз муҳитни шакллантириш йўналишидаги ишларни янада кучайтиришни топширди.

– Мутасадди бошқармалар ва департаментлар болаларнинг хавфсизлигини таъминлашга эътиборни кучайтириб, мактаб олдидаги йўлларга йўл белгилари, назорат камералари, сунъий тўсиқлар, пиёдалар йўлаги, светофорлар ва бошқа мосламаларни ўрнатишни жорий йилда тугатиши зарур. Мактабларнинг панжаралари ва назорат тизими талабга мувофиқлаштирилиши, огоҳлантириш ускуналари, айланма ғов ўрнатиш, кузатувчи билан таъминлаш ва бошқа масалалар юзасидан режа тасдиқлансин. Бу ишлар ҳокимлик томонидан қўллаб-қувватланади, – деди Дархан Сатибалди.

Вилоят инсон салоҳиятини ривожлантириш бошқармаси раҳбари Динислам Бўлатханулининг айтишича, вилоятдаги 1000та мактабда 515 мингга яқин ўқувчи, 52та коллежда 37 минг нафарга яқин талаба ўқийди. 1364та болалар боғчасида эса 151 минг кичкинтой тарбияланмоқда.

Давлат раҳбари Қ. Тўқаевнинг “Мактабгача ва ўрта таълим муассасаларини видеокузатув тизими билан 100 фоиз таъминлаш” топшириғига мувофиқ, вилоятдаги мактаб ва болалар боғчалари видеокузатув ускуналари билан 100 фоиз таъминланган. Лекин уларнинг 3328таси эскирган. Айланма ғов ўрнатиш ва огоҳлантириш тизими билан таъминлаш, ҳожатхоналарни талабга мослаштиришни молиялаштириш юзасидан мажлисда тавсиялар берилган.

Мажлисда болаларнинг ҳуқуқларини ҳимоя қилиш, уларнинг ҳар томонлама ривожланиши учун шароитлар яратиш, руҳий ёрдам кўрсатиш масалалари ҳам муҳокама қилинди. 

Туркистон вилоятида болалар ҳуқуқлари бўйича вакил Гулжан Вероцкая болалар ҳуқуқларига оид масалаларга тўхталиб, уларни ҳал этиш юзасидан тавсиялар берди.

– Мактаб руҳшунослари режага мувофиқ, руҳиятга оид тадбирлар ўтказмоқда, лекин шунга қарамай, жиддий вазият юзага келганда, улар ёрдам бера олмайди. Руҳшунослик соҳасида қўлланмаларнинг етишмаслиги сабабли, кимга қандай ёрдам кўрсатиш тўғрисида аниқ йўриқномалар йўқ. Вилоятимиз болалар сони бўйича мамлакатимизда етакчи бўлганлиги боис, болалар ҳуқуқларини ҳимоя қилиш муҳим аҳамият касб этади – деди у.

Минтақа раҳбари тавсия қилинган лойиҳалар бўйича иш юритишни топширди.