Туркистон вилояти ҳуқуқ-тартибот органлари ва департамент раҳбарлари Арис шаҳри аҳолиси билан учрашиб, уларнинг мурожаатларини тинглади. Аҳоли томонидан аниқ таклиф ва мурожаатлар айтилиб, тегишли жавоблар олинди.

Умуман олганда, ўтган йили вилоят раҳбариятининг арисликлар билан учрашуви чоғида кўтарилган қатор муаммолар ечимини топди. Вилоят ҳокими Дархан Сатибалди навбатдаги учрашувда ҳам ҳар бир таклиф ва мурожаат эътиборга олинишини таъкидлади.

– Маҳаллий ҳокимият органларининг асосий мақсади – аҳоли фаровонлиги учун қулай шарт-шароитлар яратиш ҳамда ҳудуднинг ижтимоий-иқтисодий тараққиётини таъминлашдан иборат. Ўтган йили Жўсал аҳоли манзилининг аҳолиси Оққала қишлоғигача йўлнинг сифатсизлигидан шикоят қилган эди. Бюджетдан маблағ ажратилиб, 5,3 чақирим йўл асфальтланди. “Сирдарё” кичик туманидаги истироҳат боғини таъмирлашга 76,5 млн. тенге ажратилиб, қурилиш ишлари олиб борилди. Ички йўлларни таъмирлаш учун ўтган йили 191 млн. тенге ажратилиб, Жидели, Санали аҳоли манзилларида 10та кўча таъмирланди. Аҳоли “Науриз” кичик туманида мактаб барпо этишни илтимос қилган эди. Ушбу масала юзасидан “Қулай мактаб” қалдирғоч лойиҳаси доирасида 900 ўринли янги мактаб қурилиши бошланади. “Тараз” кичик туманида 600 ўринли битта мактаб барпо этилади, – деди Дархан Амангелдиули.

Аҳоли томонидан экологияни яхшилаш, темир йўл салоҳиятидан фойдаланиш, йўл қуриш, қозонхоналарни янгилаш, ичимли сув, газ, оғир юк машиналарининг ҳаракатини назорат қилиш, дамба қуриш каби кўплаб масалалар кўтарилди.

Минтақа раҳбари фуқаролар мурожаатлари таҳлил қилиниб, қонун доирасида ҳал этилишини маълум қилди.

Шаҳарда асосий капиталга йўналтирилган сармоя ҳажми 15,4 млрд. тенгени ташкил этиб, 2021 йилга нисбатан 6,2 млрд. тенгега ортди. Кейинги икки йил ичида 7,5 млрд. тенгега 10та сармоявий лойиҳа амалга оширилиб, 100дан зиёд иш ўринларини яратиш режалаштирилган.

Қишлоқ хўжалиги соҳасида яхши кўрсаткичлар мавжуд. Ўтган йили 23,5 млрд. тенгелик қишлоқ хўжалиги маҳсулотлари ишлаб чиқарилган бўлса, 2021 йилга нисбатан 3,6 млрд. тенгега ошди. Жорий йил дала ишлари учун давлат томонидан 1,5 минг тонна имтиёзли дизел ёқилғиси ажратилди. “Муборак Агро” компанияси 600 млн. тенгелик қорамол бўрдоқилаш майдончасини очди. “Алаш Логистик” бирлашмаси томонидан 5 минг бош қорамолга мўлжалланган бўрдоқилаш майдончаси қуриб битказилди. Балиқчилик ҳам жадал ривожланмоқда. “Дермене Агро Груп” компанияси ҳовузида 30 минг балиқ етиштиришни бошлади. Кейинчалик хўжаликни ривожлантириш мақсадида 300 млн. тенге сармоя жалб этиш режалаштирилган.

Шаҳар ҳудудидаги бир неча кичик туман табиий газ тармоғига уланган. Ҳозир Байирқум, Кўкжиде, Жидели аҳоли манзилларида газ қувурларининг қурилиши олиб борилмоқда.