Вилоятда яйловларни аҳолига қайтариш тадбирлари жадаллик билан амалга оширилмоқда.  

ҚР Президенти Қ. Тўқаевнинг бу борадаги топшириғини амалга ошириш мақсадида  вилоят ҳокими Д. Сатибалди махсус йиғилиш ўтказди.  Тадбирда ўтган йили вилоятда 412,2 минг гектар ер давлат тасарруфига қайтарилиб, меморандум асосида 622,6 минг гектар ер ўзаро фойдаланишга берилгани айтилди.

Шу тариқа, 1 млн. гектардан зиёд ер майдони яйловлар учун тақсимланган.

“Ҳаммабоп яйлов” лойиҳаси доирасида вилоят ҳокимлиги прокуратура билан ҳамкорликда тадбирлар режасини ишлаб чиқиб, ишчи гуруҳи таркибини тасдиқлаган. Гуруҳ аъзолари қишлоқлардаги чорва моллари сонини аниқлаб, яйловлар чизмасини  тайёрлаган. 

Вилоят ер муносабатлари бошқармаси раҳбари Е. Тилегеннинг айтишича, 2022 йил 1 июлдан қишлоқ хўжалиги мақсадидаги ер участкаларидан мақсадли фойдаланишни назорат қилиш мақсадида фазодан кузатиш ишлари олиб борилган. Натижада 4543 ер фойдаланувчининг 560,6 минг га ерни мақсадга мувофиқ фойдаланмаганлиги аниқланган.