Қозоғистон Республикаси Президенти Қасим-Жўмарт Тўқаев янги Солиқ кодекси ва унга оид ўзгартишлар ҳақидаги Қонунни имзолади. Бу ҳужжат мамлакатда солиқ сиёсатида шаффофлик, адолат ва рақобатбардошликни таъминлашга қаратилган.

Солиқлар камаяди, тизим соддалашади

Янги кодексга кўра:

* Солиқ ҳисоботлари 30 фоизга қисқаради.

* Солиқ турлари 20 фоизга камайтирилади.

Солиқ юки адолатли тақсимланади,  сармоялар учун рағбат кучайишига хизмат қилади. 

ҚҚС ва даромад солиғига янгича ёндашув

Қўшилган қиймат солиғининг (ҚҚС) базавий ставкаси 16 фоиз миқдорида белгиланди. Айрим товар ва хизматлар (дорилар, тиббий ёрдам, китоблар) ҚҚСдан озод қилинади ёки пасайтирилган ставка билан солиққа жалб этилади.

Даромад солиғи бўйича даражаланган миқдор жорий этилди: юқори даромадли фуқаролар ва тадбиркорлар учун 15 фоиз солиқ ставкаси белгиланди.

Бизнес учун имтиёзлар

* Пенсия тўловлари даромад солиғидан озод этилди.

* Мобил иловалар орқали якка тадбиркорлар солиқ тўлаш имконига эга.

* Фермерлар ва қишлоқ хўжалиги учун имтиёзлар сақланиб қолинди.

Мол-мулк ва қимматбаҳо товарларга солиқ кучайтирилади

Қимматбаҳо автомобиллар, кемалар, спиртли ичимликлар ва сигаретларга 10 фоиз акциз жорий этилди. Қиймати 450 миллион тенгеден юқори бўлган кўчмас мулкларга солиқ миқдори оширилади.

Солиқ назорати – тушунарли ва босқичма-босқич

Солиқ қарзларини кечиктириб ёки бўлиб-бўлиб тўлаш мумкин. Кичик қарзлар учун бизнес ҳисоблари блокланмайди, огоҳлантиришлар берилади.

Янги кодекс қачон кучга киради?

Солиқ кодекси 2026 йил 1 январдан амалга киритилади. Унинг тўлиқ матни матбуотда эълон қилинади.

Янги Солиқ кодекси Қозоғистонда иқтисодий барқарорлик, адолатли солиқ юки ва сармоявий муҳитни яхшилашга хизмат қилади. Унда жамият манфаатлари ва тадбиркорликни ривожлантириш ўртасида мувозанат сақланган.