Қозоқ миллий мусиқа санъатининг нодир йўналишларидан бири бўлган дўмбира ижроси бугунги кунда замонавийлик ва анъанавийликни уйғунлаштирган ҳолда янги руҳ, янги нафас касб этмоқда. Бу борада истеъдодли ёшлар орасида Малика алоҳида эътирофга сазовор.

5 июль – “Қозоқ халқи дўмбираси” куни муносабати билан Туркистон шаҳридаги “Дўстлик уйи”да ўтган “Үкілі домбыра” анъанавий танловида кўплаб иқтидорли ёшлар қаторида қорамуртлик истеъдодли қиз – Малика Абдикаримова ҳам фаол иштирок этди. У миллий чолғу санъатида намоён этган маҳорати билан ҳакамлар ҳайъати ва томошабинлар юракларини забт этиб, муносиб равишда 2-ўринни эгаллади.

Малика Ўткир қизи – Қорамурт қишлоғидаги Киров номли 6-сонли мактабнинг 9-синф ўқувчиси. Дарслардан ташқари у 3 йилдан буён Оқсувкент қишлоғидаги 1-сонли Сайрам болалар мусиқа мактабида таҳсил олмоқда.

У дўмбирани шунчаки чалмайди – у унинг қалбидаги туйғулар, Ватанга бўлган муҳаббат, миллат фахри ва аждодлар мероси садо орқали ҳаётга дахлдор тарзда янграйди. Унинг ҳар бир ижроси эл қалбида миллий ғурур уйғотади, замонавий авлодни илдизларга боғлайди.

Малика учун дўмбира нафақат мусиқий асбоб, балки тинчлик, ифтихор ва меҳр-муҳаббат рамзи. У ўз иқтидори ва фидойилиги билан санъатга садоқатини намоён этиб, миллий мусиқамизнинг янги авлод сафларида ўз ўрнини топмоқда.

У ўзининг истеъдоди ва меҳнати туфайли Алмати, Туркистон, Шимкент каби йирик шаҳарларда ўтказилган қатор мусиқа танловларида қатнашиб, фахрий ёрлиқлар, диплом ва сертификатлар билан тақдирланган.

Маликанинг бу каби ютуқлари юртимизда ёш авлод тарбияси, миллий санъатга бўлган эътибор ва ғамхўрлик самарасидир. Зеро, Янги Қозоғистонда ҳар бир иқтидор соҳиби давлат ва жамиятнинг эътиборида.

Биз, Малика каби ёшларга ижодий парвоз, кенг салоҳият ва миллий санъат йўлида зафарлар тилаймиз.