Беш хонали янги уй соҳиблари – меҳнат фахрийси А. Ўринбаев ва умр йўлдоши Л. Алихан қизи шаҳар ҳокими ва барча ёрдам берганларга самимий миннатдорчилик билдирди

Туркистон шаҳрининг Ўртоқ мавзеси Бўсаға кўчасидаги беш хонали янги 19-сонли уй жума куни кечқурун жамоат ташкилотлари раҳбарлари, ОАВ вакиллари, шаҳар ҳокимлигидан ташриф буюрган масъул мутахассислар билан гавжум бўлди.

Фаол обуначимиз, вилоят оқсоқоллар кенгаши аъзоси Райимжон Қўчқоров раҳбарлик қилаётган “Үлес” вилоят жамоат хайрия жамғармаси саъй-ҳаракатлари билан Туркистон, Кентов, Саврон туманларида бугунга қадар 49 уй эгаларига топширилган. Бунёд этилган 50-уйни муҳтож соҳибларига – Кентов конида ишлаган меҳнат фахрийси, 88 ёшдаги Абдинаби Ўринбаев ҳамда умр йўлдоши, биринчи гуруҳ ногирони Лена Алихан қизига тантанали топширишга бағишланган тадбирга шаҳар ҳокими Азимбек Пазилбекули ташриф буюрди. 

Барча қулайликлар муҳайё қилинган, ҳатто томорқасида ўнта товуғи билан товуқхона ҳам қурилган ушбу уй қурилишига фаол обуначиларимиз, хусусан, Уйғун Иброҳим ўғли раҳбарлик қилаётган “АSIA BREND” мебель корхонаси ҳам муносиб ҳисса қўшди. 

Вилоят оқсоқоллар кенгаши раиси Жарилқасин Азиретбергенов шаҳар ҳокимига Райимжон Қўчқоров раҳбарлигидаги “Үлес” ЖТнинг ишчан фаолияти ҳақида миннатдорчилик билан гапириб берди. Туркийлар олами маънавий пойтахтидаги фаол оқсоқоллар ташаббусига юксак баҳо берган шаҳар ҳокими 50-уй сертификатини хонадон соҳибларига топширар экан, янги уйга ўз номидан қимматбаҳо музлатгич ускунасини ҳадя қилди. 

Ушбу хонадоннинг ўғли Арман 15-сонли М. Жумабаев номли мактабнинг 9-синфида ўқийди. Тадбирда юқорида исмлари зикр этилган фаоллар билан бирга фахрий оқсоқоллар Тўлқин Саидмуродов, Тойир Абдувалиев, Ҳусан Убайдуллаев, Ҳусан Маккамбоевлар шаҳар ҳокими билан бирга тасмани тантанали қирқишди. Ногиронлар аравачасидаги Лена Алихан қизи қўлларини дуога очиб, оналик фотиҳаси – қувончларини баҳам кўриб келган барча аҳли яхшиларга самимий миннатдорчилигини изҳор этди. 

Янги уйни оралаб кўрган меҳмонлар дастурхондан таъм тотгач, вилоят оқсоқоллари сардори Жарилқасин Азиретбергенов дуои фотиҳа берди.