Туркистон вилояти ҳокими Дархан Сатибалдининг топшириғига мувофиқ 2023-2027 йилларда Туркистон вилояти агросаноат мажмуасини ривожлантириш концепцияси ишлаб чиқилди. Ҳужжатда қишлоқ хўжалиги соҳасида олтита асосий йўналишни ривожлантиришга устувор аҳамият қаратилган. Хусусан, 2027йилгача ялпи маҳсулот ҳажми ва меҳнат унумдорлигини икки баравар, хусусий сармоялар ҳажмини олти баравар, қайта ишланган қишлоқ хўжалиги маҳсулотлари экспортини эса 2,3 баравар ошириш режаланган.

Вилоят ҳокими Дархан Сатибалди раислигида ўтган кенгайтирилган йиғилишда йирик қишлоқ хўжалиги ишлаб чиқарувчилари, сармоядорлар ва олимлар иштирок этиб, концепЦияни АТРОФЛИЧА муҳокама қилдилар. Қайд этилишича, лойиҳа вилоят қишлоқларида ширкатларга бирлашиш ҳаракатини ривожлантиришга туртки беради.

Беш йилга мўлжалланганТуркистон вилоят агросаноат мажмуАСИ араққиёти концепцияси агросаноат мажмуасини сифат жиҳатидан янги тараққиёт босқичига олиб чиқади, рақобатбардошлигини оширади, ички озиқ-овқат бозори барқарорлиги ва экспортга салоҳиятини мустаҳкамлайди.

Ҳужжатда 2023 йил учун 37та асосий кўрсаткич тасдиқланган. Жумладан, экин майдонларини 860 минг гектарга, бир майдондан бир неча бор ҳосил олиш лойиҳаси учун ер майдонини 9 минг 303 гектарга етказиш режаланган.

Бундан ташқари, 93 гектарда иссиқхоналар барпо этиш, сувни тежайдиган технологияларни жорий этган ҳолда майдонларни 39,2 минг гектарга, интенсив боғларни 665 гектарга, токзорларни 120 гектарга кўпайтириш режаланган. Маҳсулотларни сақлаш ҳажмини қўшимча равишда 29,3 минг тоннага ошириш, 1346та қишлоқ хўжалиги техникаси харид қилиш режаланган. 

Ҳужжатга кўра, йилига 40 минг тонна мева-сабзавот, 17 минг тонна гўшт, 37 минг тонна сут маҳсулотларини қайта ишлаш корхоналарини барпо этиш режаланган. 1000 бошга мўлжалланган 13та озиқлантириш шохобчаси, 200 бошга мўлжалланган тўртта сут фермаси очилади. Тўртта йирик паррандачилик ва 270 мингта бошқа оилавий паррандачилик фермалари ишга туширилади.

Жорий йилда Туркистон вилоятида тўртта тўқимачилик ва тикувчилик корхонаси ҳамда олтита жун ва терини қайта ишлаш корхонаси ишга туширилади. Натижада қишлоқ хўжалигининг асосий капиталига 75,2 миллиард тенге, озиқ-овқат саноатига 11 миллиард хусусий сармоя киритилиши, ялпи маҳсулот ҳажми эса 1 триллион 127 миллиард тенгега етиши кутилмоқда.

– Қишлоқ хўжалиги Туркистон вилояти иқтисодиётининг асосий ва етакчи тармоғи ҳисобланади. Шу боис 2023-2027-йилларга мўлжалланган агросаноат мажмуасини ривожлантириш концепцияси биз учун жуда муҳим. Бу борадаги ишларни тизимли равишда амалга ошириб, бозорда харидоргир ва рақобатбардош қишлоқ хўжалиги маҳсулотлари етиштиришни ўз олдимизга мақсад қилиб қўйишимиз керак. Шу билан бирга, давлат дастурларининг қишлоқ хўжалиги кооперациясини ривожлантиришга самарали йўналтирилганлигини назорат қилиш муҳим, – деди Дархан Сатибалди.

Қишлоқ хўжалигида олтита асосий йўналиш ривожланмоқда. Булар экинларни ранг-баранглаштириш, иссиқхоналарни, интенсив боғдорчиликни ривожлантириш, мева-сабзавот маҳсулотларини сақлаш юкламасини ошириш, пахта кластери, чорвачилик ва қайта ишлаш саноати тараққиётини таъминлаш борасидаги сармоявий лойиҳалар.

Йиғилишда вилоятнинг йирик қишлоқ хўжалик ишлаб чиқарувчилари сўзга чиқиб, ривожланган давлатларнинг илғор ёндашувлари ҳақида фикр юритишди. Олимлар жанубий иқлим учун энг қулай ҳисобланган узумчиликни ривожлантиришга эътибор қаратдилар. Беда етиштириш дастакларини такомиллаштириш ҳақида ҳам фикр юритилди.