Жанубий минтақалардаги ёш кадрлар етишмайдиган қишлоқларда ёшларни ўқитиш ва иш билан таъминлашга мўлжалланган “Серпін” дастури бугунги кунда юксак самара бермоқда. Хусусан, илгари олий таълим маскани битирувчисидан ўзи ўқиган минтақада 3 йил ишлаб бериш талаб қилинган бўлса, энди у мамлакатнинг 11 минтақасидан истаган вилоятни танлаш ҳуқуқига эга бўлди. Яна бир ўзгариш – ишлаб бериш муддати ҳам 2 йилга қисқартирилди. Давлат грантлари Шимолий Қозоғистон, Шарқий Қозоғистон, Ақмўла, Абай, Павлодар, Қарағанди ва Қўстанай вилоятларидаги университетларга тақсимланади.

Яқинда вилоят «Ёшлар имконият маркази» ходимларидан иборат ишчи гуруҳи тузилди. Ҳозир улар Семей шаҳридаги олий ўқув юртларида таҳсил олаётган талабалар билан учрашувлар ўтказмоқда, давлат дастурлари ҳақида суҳбатлашиб, ётоқхоналар ҳолати билан танишмоқдалар. 

Дастлабки ташриф Алихан Бўкейхан номидаги университетдан бошланди. Ушбу нуфузли илм даргоҳида ёшлар «Серпін» дастури доирасида бепул таълим олишлари мумкин. Мазкур университет ва вилоят «Ёшлар имконият маркази» ўртасида битим имзоланди.

Афсуски, 2014 йили ҳаётга татбиқ этилган «Серпін – 2050» «Мангу эл ёшлари – индустрияга» давлат дастури учун ажратилган грантлар сўнгги йилларда тўлиқ ўзлаштирилмаяпти. Жумладан, 2018 йилда 3426 талаба 5089 грант учун қабул қилинса, 2019 йилда ажратилган 5109 ўринни атиги 2292 йигит-қиз эгаллади. 

2020 йилда 5107 грантга 979 талаба қизиқиш билдирди. 2021-2022 ўқув йили учун 5156та квота берилди, 2102 нафар ёшлар грант соҳиби бўлишди. Бу йил ажратилган грантлар миқдори июнь ойида аниқланади.