ҚОЗОҚ ҚЎШИҚЛАРИ ХАЛҚАРО ФЕСТИВАЛИ ҒОЛИБЛАРИ ЭЪЛОН ҚИЛИНДИ

Туркистонда “Турон овози-2023” халқаро қозоқ қўшиқлари фестивали якунига етди. Икки кун давомида дунёнинг турли бурчакларидан келган иштирокчилар қозоқ қўшиқларини ижро этишди. Биринчи куни Европа ва осиёлик хонандалар қозоқ 

санъати усталари билан дуэт куйлашди. Иккинчи куни эса улар ўзлари танлаган қозоқ қўшиқларини ижро этишди. Шунингдек, фестиваль давомида продюсер Меиржан Алиакбаров бошчилигидаги Туркистоннинг “Таңба” фольклор гуруҳининг тақдимот маросими ўтди.

Танловга Тўлеген Мухамеджанов, Сакен Майғазиев, Маржан Арапбаева, Мўлдир Ауелбекова, Нуржамал Усенбаева, Алтинай Жўрабаева, Мадина Садуақасова, Ардақ Балажанова, Калқаман Сарин, Нурғиса Дауешов, Мархаба Саби ва таниқли ижодкорлардан иборат гуруҳ ҳакамлик қилди.

Танлов натижаларига кўра барча иштирокчиларга махсус совғалар ва гулдасталар топширилди. Ҳакамлар ҳайъа­ти қарори билан бу йил тўртинчи бор ташкил этилаётган лойиҳанинг бош мукофотига Лаэлия Алиева (Озарбайжон) ноил бўлди. 1-ўринни Татьяна Ефремова (Татаристон), 2-ўринни Маргарита Шибаева (Беларусь), 3-ўринни Генри Гучмаиже (Грузия) ва Лоуйс Мел (Испания) эгаллади.

Таъкидлаш жоизки, Туркистон вилоятининг 5 йиллиги ва Республика байрами муносабати билан вилоят маданият ва туризм бошқармаси томонидан вилоят ҳокимлиги шафелигида ташкил этилган “Турон овози-2023” фестивалидан кўзланган мақсад юртимизнинг мусиқа таълимига оид салоҳиятини халқаро миқёсда намойиш этиш, ёш ижодкорлар фаоллигини ошириш, бадиий жамоалар репертуарининг ранг-баранглигини, концерт дастурларининг қизиқарли ва сермазмун бўлишини таъминлаш, мусиқачи ёшларнинг ўзаро фикр ва тажриба алмашиши учун кенг имконият яратиш, қўшиқлар орқали халқимиз, Буюк Дашт мамлакати мусиқа маданиятининг ранг-баранглигини дунёга намойиш этиш, туркий оламнинг маънавий пойтахти бўлмиш муқаддас Туркистонни тарғиб қилишдан иборат эди. 

Мухтасар қилиб айтганда, ҳар йили мунтазам тарзда ўтказиб келинаётган халқаро фестиваль қозоқ халқининг миллий мусиқа санъати ва қўшиқчилик анъаналарини асраб-авайлаш ва ривожлантириш, турли миллат ва элатларни санъат воситасида янада бирлаштириш, уларни гўзаллик, нафосат ва эзгуликка даъват этишга хизмат қилмоқда. 

Мусиқа бошқа санъат турлари каби ўзида ҳаётни акс эттиради. Таъкидлаш жоиз, ёш авлодни ҳар жиҳатдан етук инсон сифатида камол топтириш, уларнинг эстетик дидини юксалтиришда унинг ўрни ва аҳамияти беқиёс.