Вилоятимизда фуқароларнинг мурожаатларини ўрганиш ва муаммоларга ечим топиш юзасидан очиқ мулоқот ўтказиш анъанаси изчил давом этмоқда. Минтақа раҳбари Нуралхан Кўшеров навбатдаги қабулини ўтказиб, фуқароларнинг мурожаатларини тинглади. Соҳага мутасадди раҳбарлар билан уларда кўтарилган масалаларни ҳал қилиш йўллари таҳлил қилиниб, тегишли топшириқлар берилди.

Шахсий қабулга бир неча туман ва шаҳарлардан келган фуқаролар муҳим аҳамият касб этадиган масалаларни кун тартибига чиқаришди. Қабул жараёнида Туркистон шаҳрининг бир фуқароси ер масаласидаги муаммони кўтарди, яна бир ташаббускор робототехника бўйича мусобақа уюштириш юзасидан таклиф билдирди. Тўлебийлик фуқаро Зертас аҳоли манзилига спорт мажмуаси қуриш масаласини кўндаланг қўйди. Вилоят раҳбари ҳар бир масала юзасидан мутасаддиларга аниқ вазифаларни юклаб, тегишли чора-тадбирларни белгилаб берди.

Нуралхан Кўшеров таъкидлаганидек, халқ дардига қулоқ тутиш, фуқаролар томонидан ўртага қўйилган муаммоларни ҳал қилиш – ҳокимликнинг устувор вазифаларидан биридир. Бу йўлда очиқ мулоқот, халқ билан юзма-юз суҳбат фаолият самарадорлигини оширишда муҳим аҳамият касб этади.

Таъкидлаш жоизки, вилоят ҳокимининг қабулига egov.kz портали, e-otinish ялпи базаси орқали ҳамда “Очиқ ҳокимлик” идорасига келиб, ёзма ариза орқали ёзилиш мумкин.