KAZINFORM. Ўлжас Бектенов биринчи Халқаро экологик анжуманда сўзга чиқар экан, Каспий денгизи сатҳининг пасайиши минтақанинг асосий хатарларидан бирига айланганини таъкидлади.

У Каспий денгизи сатҳининг пасайишига эътибор қаратиб, Каспийбўйи давлатлари ўртасида минтақавий ҳамкорликни фаоллаштириш зарурлигини қайд этди.

– 2000 йиллар бошидан буён Каспий денгизи сатҳининг пасайиш жараёни кузатилмоқда. Мазкур ва бошқа муаммоларни ўрганиш мақсадида Каспий денгизи бўйича Қозоғистон илмий-тадқиқот институти ташкил этилди. Олимларнинг тахминлари хавотир уйғотади. Бу бетакрор сув ҳавзасини асраб қолиш учун барча Каспийбўйи давлатларининг қатъий ва мувофиқлаштирилган ҳаракатлари талаб этилади, – деди Бош вазир.

Сув масалаларига бағишланган тадбирда Ўлжас Бектенов Оролбўйи вазиятига ҳам эътибор қаратди. Ҳозирги кунда Қозоғистон Халқаро Оролни қутқариш жамғармасига раислик қилмоқда. Мамлакатда Оролни тиклаш ишлари олиб борилмоқда.

Бош вазир, шунингдек, музликларни сақлаб қолишга қаратилган ишлар аҳамиятини ҳам таъкидлади. Мутахассислар тахминига кўра, 2100 йилга келиб Марказий Осиёда музликлар ҳажми жиддий равишда камаяди. Шу муносабат билан Қозоғистон Президенти ташаббуси билан Ар-Риёд саммитида музликларни ўрганиш ва муҳофаза қилиш юзасидан саъй-ҳаракатларни бирлаштирадиган “Сув манбалари шериклиги”ни тузиш таклиф қилинди.

 Қозоғистон сув омборларини бошқаришдан тортиб, сув ҳисоби юритишни автоматлаштиришгача бўлган қўшма гидротехник лойиҳаларни амалга оширишга тайёр экани таъкидланди.

Пленар йиғилишда Россия Федерацияси Ҳукумат раиси Михаил Мишустин, Арманистон Бош вазири Никол Пашинян, Беларусь Бош вазири Александр Турчин, Қирғизистон Бош вазири Адилбек Қасималиев, Тожикистон Бош вазири Қоҳир Расулзода, Ўзбекистон Бош вазири Абдулла Орипов, шунингдек, Туркманистон Вазирлар маҳкамаси раиси ўринбосари Нокерогли Атагулиев иштирок этди.